پەیامی جێگری سەرۆکی هەرێم لەساڵیادی دامەزراندنی یەکێتیی نیشتیمانیی کوردستاندا

(٥٠) ساڵ خەباتی نەپچڕاوەی پڕ لە تێکۆشان و مێژوویەکی تەژی لە سەرەوەریی و سەربەرزی، تا ئەم قۆناغەی ئێستای نێو ئاڵنگارییەکانی دنیای سیاسەتی پڕ لە کێشمەکێش و یەکتر سڕینەوە، شکۆیە و شانازییە بۆ ئێمەی خاوەن ڕێبازی مام، کە یەکێتی تا ئەم کاتە هێزێکی کاریگەری نێو گۆڕەپانی سیاسیی عێراق و ناوچەکەیە بە شێوەیەکی گشتی، بە دڵنیاییشەوە بۆ ئایندەیەکی گەشاوەتر لە هەنگاوەکانی بەردەوامە، چونکە هێزی یەکێتی هێزی گەلە و ئاواتی بەدیهێنانی خەونەکانی گەلی کوردە.

لەم بۆنە پیرۆزەدا، کە یادی پەنجا ساڵەی دامەزراندنی یەکێتییەکەمانە، گەرمترین پیرۆزبایی ئاراستەی سەرۆکی یەکێتیی نیشتیمانیی کوردستان، ئەندامانی ئەنجومەنی باڵای سیاسیی و بەرژەوەندییەکانی یەکێتی، ئەندامانی ئەنجومەنی سەرکردایەتی، کەسوکاری سەربەرزی شەهیدان، پێشمەرگە دێرین و زیندانییە سیاسیەکان، پێشمەرگەکانی سەنگەری بەرگری لە نیشتیمان و جەماوەرە دڵسۆزەکەی یەکێتیی نیشتیمانیی کوردستان دەکەم.

یەکێتیی نیشتیمانی، هەمیشە لە بەرەی گەلەوە هەنگاو و جوولە سیاسییەکانی ناوە و بیروڕای جیاوازی بۆ چارەسەری کێشەکان هەبووە لە گشت قۆناغە جیاجیاکانی نێو کایەی سیاسیدا، بژێوی ژیان و دەستەبەری مافەکانی جەماوەری بە ئەرک و خەمی خۆی زانیوە، ئەمەش سەلمێنەری ئەوەیە کە یەکێتی لە دیدگای بەرپرسیارێتیی و لەسەر بنەمای دیموکراسییەت و ماف و ئازادیی و دادپەروەری کۆمەڵایەتی درێژەی بە خەباتی شۆرشگێری و بەردەوامبوونی پڕۆسەی حوکمڕانی داوە.

هیواخوازم لەم یادەدا، یەکێتی وەک هێزێکی پێشکەوتنخواز و خاوەن ئەزموون لە پڕۆسەی حوکمڕانیدا لە ڕوانگە دیموکراسیی و پێشنیار و تێزە پڕ واقیعیەکانی وەرچەخانێک بێنێتە ئاراوە بۆ چارەسەرکردن و چەسپاندنی پرسە دەستووریی و یاساییەکان، هەروەها کار بکات بۆ تێپەڕاندنی ئەو ئاڵنگاریی و بەربەستانەی کە لە بەردەم پڕۆسەی سیاسیی عێراق و کوردستاندا بوونی هەیە.

لەم یادە پڕ شکۆیەدا، سەری ڕێز و نەوازش بۆ گیانی پاکی دامەزرێنەر و سەرکردەی مێژوویی و خەباتگێڕی گەلەکەمان هەڤاڵ مام جەلال و سەرجەم شەهیدانی یەکێتیی نیشتیمانیی کوردستان دادەنەوێم.

شێخ جەعفەر شێخ مستەفا
جێگری سەرۆکی هەرێمی کوردستان
٢٠٢٥/٦/١