جێگری سەرۆکی هەرێم لەگەڵ کونسوڵی گشتیی تورکیا کۆبووەوە
ئەمڕۆ دووشەممە ٢٠٢٥/١/٢٠ بەڕێز شێخ جەعفەر شێخ مستەفا، جێگری سەرۆکی هەرێمی کوردستان،پێشوازی لە بەڕێز ئەرمان تۆپچو، کونسوڵی گشتیی تورکیا لە هەرێمی کوردستان کرد.
لە کۆبوونەوەکەدا، هەردوولا جەختیان لە پەرەپێدان و بەردەوامیی پەیوەندییەکانی نێوان تورکیا و هەرێمی کوردستان لەسەر بنەمای بەرژەوەندی هاوبەش کردەوە، هەروەها هاوڕابوون لەسەر گرنگیی پاراستنی ئاسايش و سەقامگیریی ناوچەکە و تێوەنەگلان و دوورخستنەوەی عێراق لە ململانێ و ئاڵۆزییەکانی وڵاتانی دەوروبەر.
دوایین پێشهاتەکانی بارودۆخی سیاسیی و ئەمنی ناوچەکە، گۆڕانکاریی و پەرەسەندنەکانی سوریا و ڕێککەوتنی ئاگربەست لە نێوان حەماس و ئیسرائیل لە غەززە، تەوەرێکی دیکەی دیدارەکە بوو.